"ماريونيت"
يمين يمين شمال شمال
عايشة وهو ده الحال
روحي في مكان وأنا في مكان
بتنفس عادي ما أنا انسان
الآهة ساكنة وساكتة جوة مني
والكلمة تايهة سارحة بتشاغلني
والحرف هارب ضايع
وأنا بحارب بصارع
كل اللي فيا ..كل اللي ليا
بقولها آه والمليون لأ هربوا
بطلق وحوش رفضي آلاقيهم استخبوا
واستحبوا وداعة القطط
والنظام كما الحروف ومن فوقها النقط
علي الصراط المستقيم مشيت
الخطوة ثابتة ولا اتهزيت
الحاضر والنعم طالعة مني كما النغم
والحاصل من جوة جوايا ألف لغم ولغم
من الرجال غيره ما رأيت
قولت أيوة ودلوقتي بقول ياريت
الصرخة فيا محبوسة متكتفة
وكياني من اللأات اكتفي
وكتير بقول خلاص هثور
خلاص هكون فاعل ومش مفعول
هكسر قيودي هتغير
وكل أما أفكه يضيق أكتر
ويخنق روح روحي ويقتل
زي ما يكون الرفض معناه أقبل
وارجع واكشر علي نيابي
وأمسك في بقي ديل جلبابي
وأقول هطير ومش هقول أنا ست
وهقطع بايدي خيوط الماريونيت

 

جيهان ظاظا

 

من الكتاب الجماعي "ماريونيت"

طمن نفسك
جمل روحك
ودع همك
انسي جروحك
ازرع املك
اغلب يأسك
حب الدنيا
وارضي طموحك